પ્રેમને કેવું બંધન?

ખબર નથી
તારી અને મારી ને
મારી અને તારી વચ્ચે
શો સંબંધ છે?
પણ
હું જાણું છું કે
તારી અને મારી ને
મારી અને તારી
આંખો સતત
એકબીજાને ઝંખે છે.
આંખોથી આંખો ચોરાવી
તું મને જુએ છે
અને
ચૂપકીદીથી
હું તને જોઈ લઉં છું.
હું જાણું છું કે
તારી અને મારી ને
મારી અને તારી પર
ચોકીપહેરો છે
દુનિયા અને દુનિયાદારીનો.
પણ
પ્રેમને કેવું બંધન?
આવ
મારી અને તારી ને
તારી અને મારી વચ્ચે
ઊભી કરેલી દિવાલને
નેસ્તોનાબૂદ કરી નાંખીએ
અને
જતાં રહીએ પેલે પાર
જ્યાં મારા અને તારા ને
તારા અને મારા સિવાય
બીજું કોઈ ન હોય.